صنعتی علاقوں میں بجلی کی بلاتعطل فراہمی کے لیے مختلف
منصوبوں اور ستی بجلی کی فراہمی میں ایس ٹی ڈی سی کا
کلیدی کردار ہے، وزیر توانائی سندھ
ویب نیوز رپورٹ: روبینہ یاسمین
کراچی: وزیر توانائی و ترقیات و منصوبہ بندی سندھ ، سید ناصر حسین شاہ کی زیر صدارت سندھ ٹرانسمیشن اینڈ ڈسپیچ کمپنی (ایس ٹی ڈی سی) کا اعلیٰ سطح اجلاس ہوا، جس میں توانائی کے شعبے سے متعلق اہم منصوبوں کا جائزہ لیا گیا ۔ ایس ٹی ڈی سی کے سی ای او سلیم شیخ نے اجلاس کو تفصیلی بریفنگ دیتے ہوئے سندھ میں جاری منصوبوں کی تفصیلات سے آگاہ کیا ۔
ناصر حسین شاہ نے دوران اجلاس کہا کہ صنعتی علاقوں میں بجلی کی بلاتعطل فراہمی کے لیے ایس ٹی ڈی سی مختلف منصوبوں پراچھا کام کررہی ہے، ایس ٹی ڈی سی کے جاری منصوبوں سے پاکستانی صنعتکاروں کو نہ صرف ریلیف ملے گا بلکہ ملکی معیشت کو استحکام بھی حاصل ہوگا ۔
وزیر توانائی سندھ نے کہا کہ سستی بجلی کی
فراہمی کے لیے ایس ٹی ڈی سی اہم کردار
ادا کررہی ہے اور اس کے منصوبوں کی
تکمیل سے نہ صرف عام صارفین کو ریلیف
ملے گا بلکہ صنعتی اداروں کو بھی فائدہ ہوگا
ناصر حسین شاہ نے اجلاس میں بتایا کہ کے فور واٹر پروجیکٹ میں بجلی کی فراہمی کے حوالے سے ایس ٹی ڈی سی واٹر کارپوریشن کے ساتھ مل کر ذمے داریاں ادا کرے گی، جبکہ کے فور منصوبے کے تحت گرڈ اور ٹرانسمیشن لائن جون 2026 تک مکمل کرلی جائے گی۔
انہوں نے کہا کہ نوری آباد پاور پلانٹ سے 100 میگاواٹ بجلی کی ترسیل 24 گھنٹے جاری ہے اور ایس ٹی ڈی سی کے فور کی ٹرانسمیشن لائن کے ذریعے کے الیکٹرک کو بھی چوبیس گھنٹے بجلی فراہم کی جارہی ہے۔ نوری آباد ٹرانسمیشن لائن کی کارکردگی کو بھی وزیر توانائی ناصر حسین شاہ نے تسلی بخش قرار دیا۔
یہ بھی پڑھیں
دو سو چھیاسٹھ 266 ملین روپے کا ٹارگٹ کس کو ملا؟
فاؤنڈیشن سولر انرجی لمیٹڈ کا منصوبہ کیا ہے؟
اجلاس میں سیکریٹری توانائی مشتاق سومرو، ایس ٹی ڈی سی کے سی ای او سلیم شیخ، عمر نواز شیخ، سجاد جونیجو، طارق سعید سمیت دیگر افسران شریک ہوئے۔
اجلاس میں ایس ٹی ڈی سی کے ملازمین کی تنخواہوں میں اضافے کی بھی منظوری بھی دی گئی ۔ وزیر توانائی نے ہدایت دی کہ حکومت سندھ کی پالیسی کے مطابق کم گریڈ ملازمین کی تنخواہوں میں زیادہ اضافہ کیا جائے جبکہ افسران کی تنخواہوں میں نسبتاً کم اضافہ کیا جائے، تاکہ کم آمدنی والے ملازمین کو زیادہ ریلیف مل سکے۔
وزیر توانائی سندھ نے ایس ٹی ڈی سی کے افسران کو اپنی صلاحیتوں اور کارکردگی کو مزید بہتر بنانے کی بھی ہدایت دی۔
