ناصر شاہ اور ضیا لنجار کی زیر صدارت کیبنٹ کمیٹی برائے فناننس کا اجلاس، کچرا اٹھانے والی گاڑیوں میں ریزر ریڈرز لگانے کا فیصلہ
ویب نیوز رپورٹ: روبینہ یاسمین
کراچی: وزیر توانائی، ترقیات و منصوبہ بندی سید ناصر حسین شاہ اور وزیر داخلہ و قانون ضیا الحسن لنجار کی زیر صدارت کیبنٹ کمیٹی برائے فنانس کا ایک اعلیٰ سطحی اجلاس انرجی ڈپارٹمنٹ سندھ کے کمیٹی روم میں منعقد ہوا ہے جس میں سندھ سالڈ ویسٹ مینجمنٹ بورڈ کی جانب سے سالانہ بجٹ 25-2024 کیلئے اضافی بجٹ کی درخواست کی گئی۔
اجلاس میں درخواست کا تمام قانونی پہلوؤں سے جائزہ لیا گیا جس کے بعد کمیٹی کے تمام ممبران اور صوبائی وزراء سندھ ، سید ناصر حسین شاہ اور ضیا الحسن لنجار کی باہمی مشاورت کے بعد سندھ سالڈ ویسٹ مینجمنٹ کیلئے آؤٹ آف بجٹ 12 ارب روپے اضافی گرانٹ کی مشروط منظوری دے دی گئی ہے۔
وزیر توانائی اور وزیر داخلہ سندھ نے سندھ سالڈ ویسٹ بورڈ کے متعلقہ افسران کو ہدایت کی کہ سیکریٹری فناننس کی گرانٹ کے حوالے تمام تشویش اور قانونی پہلوؤں و اعتراضات کو دور کیا جائے۔ علاوہ ازیں کمیٹی نے دوران اجلاس یہ بھی فیصلہ کیا کہ سندھ سالڈ ویسٹ مینجمنٹ بورڈ کچرا اٹھانے کے حوالے سے تمام متعلقہ کنٹریکٹرز کے کانٹریکٹ کا از سر نو جائزہ لے گا کیوںکہ پاکستان کے دیگر شہروں کے مقابلے میں صوبہ سندھ کے کنٹریکٹر کے ریٹ ماریکٹ سے زیادہ ہیں۔
شہر کراچی سے جانے والے کچرے کے صحیح وزن کیلئے منظم نظام قام کیا جائے اور شہر کا کچرا لے جانے والی گاڑیوں میں ریزرر ریڈر لگائے جائیں تاکہ کنٹریکٹر کو صحیح وزن کے تحت پیسوں کی ادائیگی کی جائے اور سرکاری رقوم کو ضایع ہونے سے بچایا جاسکے۔
وزیر توانائی ناصر شاہ نے مزید کہا کہ صفائی ستھرائی اور عوام کو ریلیف دینے کیلئے سندھ سالڈ ویسٹ مینجمنٹ میں مزید بہتری لائی جائے اور افسران اس سلسلے میں اپنی صلاحیتوں کا بھرپور طریقے سے استعمال کرے ۔ دوران اجلاس کمیٹی کو بتایا گیا کہ سندھ سالڈ ویسٹ مینجمنٹ بورڈ اس وقت صفائی ستھرائی اور کچرے کے حوالے سے کراچی ، حیدرآباد ، سکھر، اور لاڑکانہ میں اپنی خدمات انجام دے رہا ہے اور تقریباً 24 ملین آبادی کو اٹینڈ کر رہا ہے۔
صوبہ سندھ میں کام بڑھنے کے ساتھ ساتھ اخراجات میں بھی اضافہ ہو رہاہے جوکہ پچھلے سال کے مقابلے میں رواں برس بڑھ کر43 ارب روپے تک پہنچ گیا ہے۔ اجلاس میں مزید بتایا گیا کہ سالڈ ویسٹ بورڈ کے مختلف منصوبوں سے 10 بلین روپے آمدنی متوقع ہے۔ علاوہ ازیں جاری منصوبوں کو حتمی شکل دی جارہی ہے۔
وزیر توانائی سندھ سید ناصر حسین شاہ نے اجلاس میں مزید کہا کہ سالڈ ویسٹ کنٹریکٹرز کو وقت پر ادائیگی یقینی بنائے اور اس سسلے میں شفافیت پر مبنی میکنزم قائم کے اور صفائی ستھرائی اور کچرا اٹھانے کے عمل کو مسلسل یقینی بنانے کیلئے کنٹریکٹرز کو وقت پر واجبات کی ادائیگی انتہائی ضروری امر ہے۔
اجلاس میں فیصلہ کیا گیا کہ سالڈ بورڈ 3 سے 6 ماہ میں تمام کنٹریکٹ کو رینیو کرے گا۔ اجلاس میں چیئرمین پلاننگ اینڈ ڈیولپمنٹ سندھ نجم شاہ، سیکریٹری فنانس سندھ فیاض جتوئی، سیکریٹری لوکل گورنمنٹ سندھ کے علاوہ دیگر افسران بھی شریک تھے۔
