درخت زمین کا زیور اور انسانی بقا کے ضامن ہیں، پیپلز پارٹی عوام دوست پالیسیوں
اور ماحولیاتی تحفظ پر یقین رکھتی ہے، صوبائی وزیر توانائی سندھ
ویب نیوز : ڈیسک رپورٹ
کراچی : صوبائی وزیر ناصر حسین شاہ نے سندھ میں مون سون شجرکاری مہم کے آغاز پر کراچی میں تقریب سے خطاب کے دوران پیغام دیا ہے کہ پاکستان پیپلز پارٹی عوام دوست پالیسیوں اور ماحولیاتی تحفظ کے عملی اقدامات پر یقین رکھتی ہے۔ انہوں نے کہا کہ چیئرمین بلاول بھٹو زرداری اور صدر آصف علی زرداری کی قیادت میں ملک کو درپیش ماحولیاتی چیلنجز سے نمٹنے کے لیے مؤثر حکمتِ عملی اپنائی جا رہی ہے ۔
ناصرحسین شاہ نے کہا کہ سندھ کو سرسبز و شاداب بنانے کے لیے بڑے پیمانے پر شجرکاری مہم شروع کی جا رہی ہے اور مون سون شجرکاری مہم کے دوران لاکھوں پودے لگانے کا ہدف مقرر کیا گیا ہے۔ انہوں نے کہا کہ درخت زمین کا زیور اور انسانی بقا کے ضامن ہیں، یہی وجہ ہے کہ فضائی آلودگی کو کم کرنے اور صحت مند ماحول کی فراہمی کے لیے درخت لگانا ناگزیر ہے۔
یہ بھی پڑھیں
ایتھوپیا کے گرین ڈیولپمنٹ انیشیٹیو کا مقصد کیا ہے؟
سندھ میں 8 لاکھ گھروں کی تعمیر مکمل
انہوں نے کہا کہ پیپلز پارٹی کی پالیسیوں میں عوامی شمولیت کو ہمیشہ بنیادی اہمیت دی گئی ہے، اسی لیے اس مہم میں تعلیمی ادارے، سماجی تنظیمیں اور نجی ادارے بھی شامل ہیں ۔ ناصر حسین شاہ نے عوام سے اپیل کی ہے کہ ہر شخص کم از کم ایک پودا ضرور لگائے تاکہ آئندہ نسلوں کو بہتر ماحول فراہم کیا جا سکے۔
صوبائی وزیر نے اس عزم کا اعادہ بھی کیا کہ پیپلز پارٹی کی حکومت سندھ میں سبز انقلاب کے لیے سرگرمِ عمل ہے اور شجرکاری مہم کے ثمرات آنے والی نسلوں کو میسر آئیں گے۔
