پنجاب میں صورتحال افسوسناک، سندھ میں حالات قابو میں ہیں
سیلابی خطرے کے پیش نظر پیشگی انتظامات کیے جا رہے ہیں، ناصر حسین شاہ
ویب نیوز رپورٹ: روبینہ یاسمین
کراچی: صوبائی وزیر توانائی اور وزیراعلیٰ سندھ کی قائم کردہ فلڈ کمیٹی کے رکن سید ناصر حسین شاہ دریائے سندھ میں ممکنہ سیلابی صورتحال کا جائزہ لینے کے لیے سکھر پہنچ گئے ۔ ان کے ساتھ صوبائی وزیر آبپاشی سندھ جام خان شورو بھی موجود تھے ۔
سندھ کے دونوں وزراء نے سکھر بیراج کا دورہ کیا ۔انہیں دریائے سندھ میں بڑھتے ہوئے پانی کی صورتحال پر تفصیلی بریفنگ بھی دی گئی ۔ ناصر حسین شاہ نے کہا کہ ان کا دورہ خیرپور، نوشہرو فیروز، نوابشاہ، مٹیاری، حیدرآباد، ٹھٹھہ، سجاول اور ساحلی علاقوں تک جاری رہے گا تاکہ دریا کے پشتوں، حفاظتی انتظامات اور فلڈ الرٹ کا مکمل جائزہ لیا جا سکے۔
انہوں نے مزید کہا کہ اس دورے کے ذریعے متاثرہ علاقوں میں فوری اقدامات کے لیے رپورٹ تیار کی جائے گی ۔ وزیر آبپاشی سندھ جام خان شورو نے کہا کہ پنجاب میں سیلاب نے بڑے پیمانے پر تباہی مچائی ہے اور اب اس کا رخ سندھ کی طرف ہے، تاہم سندھ حکومت مکمل طور پر الرٹ ہے اور صورتحال پر نظر رکھے ہوئے ہے ۔
انہوں نے کہا کہ سکھر بیراج سے نو لاکھ ساٹھ ہزار 9600,000 کیوسک پانی گزارنے کی صلاحیت موجود ہے اور حفاظتی بند بھی مضبوط ہیں ۔ انہوں نے مزید کہا کہ “بیراج کے ڈھانچے کو کوئی خطرہ نہیں ، چینی ماہرین نے دروازوں کی تبدیلی مکمل کر دی ہے”۔
یہ بھی پڑھیں
عالمی بینک کےعوامی فائدے کے منصوبوں میں اہم پیش رفت
ایک سو پچاس سالہ برگد کے درخت کی بحالی مکمل
جام خان شورو نے کہا کہ کچے کے علاقے کے لوگ سیلابی صورتحال کے باوجود اپنے گاؤں چھوڑنے پر تیار نہیں ہیں، تاہم ضلعی انتظامیہ نے ریلیف کیمپس کی تیاری شروع کر دی ہے تاکہ ضرورت پڑنے پر فوری مدد فراہم کی جا سکے ۔
ناصر حسین شاہ نے کہا کہ وزیراعلیٰ سندھ، سید مراد علی شاہ نے سیلابی صورتحال پر اعلیٰ سطح اجلاس میں ضروری ہدایات جاری کردی ہیں ۔ صوبائی وزراء اور زمیندار بھی مودہ حالات پر نظر رکھے ہوئے ہیں ۔
صوبائی وزیر توانائی نے کہا کہ پنجاب میں صورتحال افسوسناک ہے، ہم دعاگو ہیں کہ وہاں آسانیاں ہوں، تاہم سندھ میں اس وقت حالات قابو میں ہیں اور ہم مطمئن ہیں ۔ انہوں نے کہا کہ “احتیاطی تدابیر کے طور پر پیشگی انتظامات کیے جا رہے ہیں تاکہ کسی بھی ہنگامی صورتحال میں بروقت اقدامات کیے جا سکیں ۔
