نظر یا کچھ اور رجب بٹ پھر سوشل میڈیا پر زیرِ بحث

معروف یوٹیوبر رجب بٹ کا کہنا ہے کہ وہ بیمار اور ذہنی دباؤ میں تھے، غلطی سے پارکنگ کی جگہ ڈرائیو گیئر لگ گیا جس سے سیلون کا شیشہ ٹوٹ گیا

ویب نیوز رپورٹ : روبینہ یاسمین

معروف پاکستانی یوٹیوبر رجب بٹ ایک بار پھر سوشل میڈیا پر زیرِ بحث آ گئے ہیں ۔ اس بار وجہ ان کی گاڑی سے پیش آنے والا ایک غیر معمولی واقعہ ہے جس کی ویڈیو اور تفصیلات سوشل میڈیا پر تیزی سے وائرل ہو رہی ہیں ۔

سوشل میڈیا پر سامنے آنے والی ویڈیوز کے مطابق، چند روز قبل رجب بٹ اپنی بھانجی آیت زہرا کی سالگرہ کے موقع پر ایک سیلون گئے تھے ۔ اس دوران پارکنگ کرتے ہوئے ان کی گاڑی اچانک آگے بڑھ گئی اور سیلون کے شیشے سے جا ٹکرائی جس سے شیشہ ٹوٹ گیا ۔

غلط گیئر لگنے کا دعویٰ

رجب بٹ نے واقعے کی وضاحت کرتے ہوئے کہا کہ ان دنوں وہ کچھ بیمار اور ذہنی طور پر پریشان ہیں۔ ان کے مطابق پارکنگ کے دوران غلطی سے پارکنگ کے بجائے ڈرائیو گیئر لگ گیا جس کے باعث گاڑی آگے بڑھ گئی ۔

یوٹیوبر کا کہنا تھا کہ وہ گزشتہ 13 سال سے گاڑی چلا رہے ہیں اور اس سے پہلے ایسا کبھی نہیں ہوا۔ ان کے بقول انہوں نے گاڑی کا گیئر نکال بھی دیا تھا مگر پھر بھی گاڑی آگے بڑھ گئی ۔

“نظر لگنے” کا بھی ذکر

رجب بٹ نے اپنے بیان میں یہ بھی کہا کہ انہیں لگتا ہے کہ ان پر کسی کی نظر لگ گئی ہے، اسی وجہ سے حالیہ دنوں میں مسلسل مسائل کا سامنا کرنا پڑ رہا ہے ۔

یہ بھی پڑھیں

جاپان فیسٹیول میں کامیابی پر اعزازات، سندھ حکومت کے بڑے اعلانات

سوشل میڈیا پر ملا جلا ردعمل

واقعے کے بعد سوشل میڈیا صارفین کی جانب سے مختلف ردعمل سامنے آئے ۔ کچھ مداحوں نے رجب بٹ کی خیریت کے لیے دعا کی اور انہیں آرام کرنے کا مشورہ دیا ۔

دوسری جانب ناقدین نے واقعے پر تنقید کرتے ہوئے اسے محض توجہ حاصل کرنے کی کوشش قرار دیا ۔ بعض صارفین نے دعویٰ کیا کہ یہ سب ویوز حاصل کرنے کے لیے کیا گیا جبکہ کچھ نے واقعے کو اسکرپٹڈ قرار دیا ۔

واقعے کی ویڈیو اور اس پر ہونے والی بحث سوشل میڈیا پلیٹ فارمز پر تیزی سے وائرل ہو رہی ہے اور صارفین اس پر اپنی رائے کا اظہار کر رہے ہیں ۔