پیرا گرین فالکن کی سب سے بڑی طاقت اس کی 390 فی گھنٹہ کی رفتار ہے، شکار، فالکنری اور عالمی پھیلاؤ کی منفرد کہانی
ویب نیوز رپورٹ : عمر ہاشمی
کراچی : پیرا گرین فالکن دنیا کا سب سے تیز رفتار پرندہ ہے ۔ یہ فضا میں غوطہ لگاتے وقت 390 کلومیٹر فی گھنٹہ تک رفتار حاصل کر سکتا ہے ۔
یہ نایاب شکاری پرندہ تقریباً پوری دنیا میں پایا جاتا ہے ۔ البتہ صرف انٹارکٹیکا اس سے مستثنیٰ ہے ۔
نمایاں خصوصیات
پیرا گرین فالکن کی پشت نیلے اور سرمئی رنگ کی ہوتی ہے ۔ زیرِ گردن حصہ سفید جبکہ اس کے چہرے پر سیاہ دھاریاں نمایاں ہوتی ہیں ۔
یہ پرندہ ڈائیو کے دوران 390 کلومیٹر فی گھنٹہ کی رفتار تک پہنچ جاتا ہے ۔
اسکی خوراک میں کبوتر اور دیگر چھوٹے پرندے شامل ہیں ۔ اس کی ایک خصوصیت یہ بھی ہے کہ یہ فضا سے اچانک حملہ کر کے شکار کو دبوچ لیتا ہے ۔
فالکنری میں اہم مقام
پیرا گرین فالکن، فالکنری میں انتہائی مقبول پرندہ ہے ۔ اسے اپنی تیز رفتاری اور شکار کی مہارت کے باعث خاص اہمیت حاصل ہے ۔
عرب ممالک میں بازداری کا شوق قدیم روایت ہے ۔ تاہم شاہی خاندانوں میں اس پرندے کی تربیت اور پرورش کو وقار کی علامت سمجھا جاتا ہے ۔
واضح رہے کہ یہ پرندہ قابلِ تربیت ہے اور اسے شکار کے لیے خصوصی طور پر تیار کیا جاتا ہے ۔
نر اور مادہ میں فرق
نر، جسے “ٹیرسل” کہا جاتا ہے، سائز میں چھوٹا ہوتا ہے۔ اس کا وزن تقریباً 430 سے 550 گرام اور قد 36 سے 44 سینٹی میٹر ہوتا ہے ۔
جبکہ مادہ نسبتاً بڑی ہوتی ہے ۔ اس کا وزن 600 سے 1000 گرام اور قد 44 سے 51 سینٹی میٹر تک ہو سکتا ہے ۔
شکار کی مہارت
پیرا گرین فالکن کی سب سے بڑی طاقت اس کی رفتار ہے ۔ یہ بلند مقام سے تیز ڈائیو لگا کر شکار پر حملہ کرتا ہے ۔ کبوتر، مرغ، چھوٹے پرندے اور بعض چھوٹے جانور اس کی خوراک ہیں ۔
افزائش نسل
ان کی افزائش کا موسم مارچ سے مئی کے مہینے تک رہتا ہے ۔
یہ جوڑا عموماً چٹانوں یا بلند عمارتوں پر گھونسلہ بناتا ہے ۔ مادہ 3 سے 4 انڈے دیتی ہے۔ انڈے 28 سے 32 دن میں سینچے جاتے ہیں ۔
نر اور مادہ دونوں بچوں کی دیکھ بھال یکساں طور پر کرتے ہیں ۔
خطرات اور تحفظ
اس کے قدرتی دشمنوں میں عُقاب اور الّو جیسے بڑے پرندے شامل ہیں ۔ بعض اوقات چیتے اور لومڑیاں بھی ان کے لئے خطرہ بن سکتے ہیں ۔
انسانی سرگرمیاں بھی اس کے لیے خطرہ ہیں ۔ غیر قانونی شکار، آشیانوں کی تباہی اور کیڑے مار ادویات اس کی بقا پر اثر انداز ہوتی ہیں ۔
یاد رہے کہ محفوظ پرندہ قرار دیئے جانے کے با عث جنگلی پیرا گرین فالکن کی تجارت غیر قانونی ہے ۔
قیمت اور قدر
تربیت یافتہ پیرا گرین فالکن کی قیمت مارکیٹ میں 5 ہزار سے 50 ہزار امریکی ڈالر تک ہو سکتی ہے ۔ تاہم مجوزہ قیمت اس کی تربیت، نسل اور شکار کی مہارت پر منحصر ہوتی ہے ۔
ہجرت اور دلچسپ حقیقت
یہ پرندہ ستمبر میں ہجرت کر کے پاکستان آتا ہے اور سردیوں کا موسم یہاں گزارتا ہے ۔
یہ بھی پڑھیں
پاکستان میں ٹونی ایگل: ایکو سسٹم بچانے والے عقاب کی بریڈنگ اور بقا کو خطرات
انڈس ڈولفن: دریائے سندھ کی نایاب رانی
کہا جاتا ہے کہ امریکا کا راڈار پر نظر نہ آنے والا جدید بی 2 اسپرٹ بمبار طیارے کی ایرو ڈائنامک ڈیزائن اس پرندے سے متاثر ہو کر تیار کیا گیا ہے ۔ یہ طیارہ بھی اب تک دنیا کا تیز ترین طیارہ ہے جو صرف امریکا کے پاس ہے ۔
پیرا گرین فالکن قدرت کا ایک حیرت انگیز شاہکار ہے ۔ پیرا گرین فالکن نہ صرف ماحولیاتی توازن برقرار رکھنے میں اہم کردار ادا کرتا ہے بلکہ زرعی علاقوں میں نقصان دہ پرندوں کی آبادی کو بھی کنٹرول کرتا ہے ۔
ان تمام خصوصیات کی بدولت پیرا گرین فالکن کی موجودگی ایک صحت مند ایکو سسٹم کی علامت سمجھی جاتی ہے ۔
