گڈو بیراج پر پانچ لاکھ کیوسک پانی کی آمد کسی بڑے خطرے کی علامت نہیں
عوام کی حفاظت کے لیے تمام انتظامات مکمل، وزیر توانائی ناصر شاہ
ویب نیوز رپورٹ: روبینہ یاسمین
کراچی : صوبائی وزیر توانائی، ترقیات و منصوبہ بندی سید ناصر حسین شاہ نے کہا ہے کہ سندھ حکومت سیلابی صورتحال 2025 پر مسلسل نظر رکھے ہوئے ہے اور عوام کی حفاظت کے لیے تمام اقدامات کیے جا رہے ہیں ۔ انہوں نے بتایا کہ اب تک تقریباً 70 ہزار افراد کو ریلیف کیمپس اور محفوظ مقامات پر منتقل کیا جا چکا ہے ۔
ناصر حسین شاہ کے مطابق، اس وقت گڈو بیراج پر پانی کی آمد تقریباً پانچ لاکھ کیوسک ہے جو کسی بڑے خطرے کی نشاندہی نہیں کرتا اور اسے بخوبی سنبھالا جا رہا ہے ۔ انہوں نے کہا کہ ماہرین کی پیش گوئی کے مطابق پانی کا بہاؤ چھ سے سات لاکھ کیوسک تک جا سکتا ہے، جس کے لیے سندھ حکومت نے انتظامات مکمل کر رکھے ہیں ۔
یہ بھی پڑھیں
سندھ میں حالیہ سیلابی صورتحال اور عوامی رہنمائی
سندھ حکومت کا قابل تجدید توانائی کی طرف انقلابی سفر
پاکستانی گاؤں سے چینی لیبارٹری تک کا سفر
صوبائی وزیرتوانائی ، ترقیات و منصوبہ بندی سید ناصر حسین شاہ نے کہا ہے کہ اگر خدانخواستہ پانی کی سطح دس لاکھ کیوسک تک پہنچتی ہے تو مزید سخت اور ہنگامی انتظامات نافذ کیے جائیں گے تاکہ عوام کے جان و مال کو محفوظ بنایا جا سکے ۔ انہوں نے مزید کہا کہ وزیراعلیٰ سندھ مراد علی شاہ کی ہدایت پر تمام ضلعی انتظامیہ ہائی الرٹ ہے اور ریلیف کیمپس میں متاثرین کو سہولیات فراہم کی جا رہی ہیں ۔
