کرکٹ کے نیشنل اور انٹرنیشنل کھلاڑیوں کے انتخاب میں پی ایس ایل کلیدی کردار ادا کر رہی ہے، وزیر توانائی ناصر شاہ
ویب نیوز : ڈیسک رپورٹ
کراچی: صوبائی وزیر توانائی، ترقیات و منصوبابندی سندھ سید ناصر حسین شاہ نے پی ایس ایل کی فاتح ٹیم لاہور قلندر کے سی ای او رانا عاطف کی ٹرافی کے ہمراہ علی ہاؤس آمد اور ملاقات کے موقع پر بات چیت کرتے ہوئے کہا ہے کہ کرکٹ کے نیشنل اور انٹرنیشنل کھلاڑیوں کے انتخاب میں پی ایس ایل کلیدی کردار ادا کر رہی ہے۔
اس موقع پر سینیٹر عاجز دھامراہ اور ممبر صوبائی اسمبلی آصف موسیٰ بھی موجود تھے۔ ناصر حسین شاہ نے کہا کہ رانا صاحب کی علی ہاؤس میں آمد میرے لئے اعزاز ہے، میں رانا صاحب کا شکر گزار ہوں کہ کرکٹ کے حوالے سے صوبہ سندھ کے باصلاحت کھلاڑیوں کو تلاش کر رہے ہیں اور ٹیلنٹ ہنٹ میں مصروف ہیں، انکی ترقی کا جو پروگرام ہے وہ ملک کی ترقی کا پلان ہے۔ سندھ کے علاوہ پورے پاکستان میں جاکر باصلاحیت نوجوان کھلاڑیوں کی تلاش ایک مشکل اور تھکا دینے والا مرحلہ ہے۔ ایک طرف سے یہ ملک کی خدمت بھی ہے۔
وزیر توانائی نے مزید کہا کہ صوبہ سندھ میں باصلاحیت نوجوان کھلاڑیوں کی کمی نہیں ہے اگر میرٹ پر ٹیلنٹ ہنٹ کیا جائے تو بہت سے نوجوان کھلاڑی ایسے ہیں جوکہ ملکی اور عالمی سطح پر اپنے آپ کو منوانے کیلئے تیار بیٹھے ہیں اور اپنی سیلیکشن کے منتظر ہیں۔
کرکٹ کے علاوہ کھیل کے دوسرے شعبوں میں صوبہ سندھ کے کھلاڑی ملکی و عالمی سطح پر اپنا لوہا منوارہے ہیں اور اپنے صوبے اور ملک کا نام روشن کر رہے ہیں ۔ کرکٹ کے فروغ اور سندھ کے کھلاڑیوں کی صلاحیتیں اجاگر کرنے کیلئے حکومت نے سندھ پریمئر لیگ کا آغاز کیا ہے جوکہ صوبہ سندھ کے نوجوان کھلاڑیوں کی صوبائی و عالمی سطح پر روشناس کرنے کیلئے اہم کردار ادا کرے گا۔
سید ناصر حسین شاہ نے لاہور قلندر کی جانب سے ٹیلنٹ ہنٹ کے تحت سندھ بھر میں کرکٹ کے ٹیلنٹ کو اجاگر کرنے اور نوجوان کھلاڑیوں کی صلاحیتوں کو ملک کیلئے بروکار لانے پر سی ای او لاہور قلندر رانا عاطف کا شکریہ ادا کیا اور سندھ حکومت کی جانب سے مکمل تعاون اور تمام ضروری سہولیات فراہم کرنے کی یقین دہانی کرائی۔
