ایم پاکس کا خدشہ، کراچی کیسز اور خیرپور وباء نے خطرے کی گھنٹی بجا دی

ایم پاکس،کراچی میں ممکنہ مقامی منتقلی کے خدشات میں اضافہ، خیرپور میں وباء کی شدت برقرار، ماہرین کا فوری اور سخت احتیاطی اقدامات اپنانے پر زور

ویب نیوز رپورٹ :ماریہ اسمعیل

کراچی : ایسا محسوس ہو رہا ہے کہ ایم پاکس (ایم پاکس) اب پاکستان میں صرف بیرونِ ملک سے منتقل نہیں ہو رہا، بلکہ کراچی میں مقامی منتقلی کا شبہ بھی ظاہر کیا جا رہا ہے ۔ مزید برآں سندھ کے ضلع خیرپور میں فعال وباء سامنے آنے کے بعد صورتحال مزید تشویشناک ہو گئی ہے۔

آغا خان یونیورسٹی ہسپتال کے وبائی امراض کے ماہرین نے صحت فراہم کرنے والوں اور پالیسی سازوں پر زور دیا ہے کہ ایم پاکس کو فوری اور سنجیدہ عوامی صحت کے خطرے کے طور پر لیا جائے، کیونکہ اب یہ صرف بیرونی کیسز تک محدود نہیں رہا۔

2025 سے 2026 تک کیسز کا بدلتا رجحان

آج میڈیا راؤنڈ ٹیبل میں ماہرین نے واضح کیا کہ پاکستان میں 2025 کے دوران ایم پاکس کے 53 تصدیق شدہ کیسز سامنے آئے، جن میں زیادہ تر سفر سے متعلق تھے، تاہم صورتحال اب تبدیل ہو رہی ہے ۔

تاہم سال 2026 میں یہ رجحان مزید واضح طور پر بدلتا دکھائی دے رہا ہے ۔ کراچی میں رپورٹ ہونے والے دو تصدیق شدہ کیسز میں سے ایک ممکنہ مقامی منتقلی کی نشاندہی کرتا ہے، جبکہ دوسری جانب خیرپور میں پھیلنے والی وباء اس بات کی طرف اشارہ کرتی ہے کہ وائرس صحت کی سہولیات تک بھی پہنچ چکا ہے۔

اس کے نتیجے میں یہ صورتحال بڑے شہروں سے باہر انفیکشن کی روک تھام اور کنٹرول کے نظام میں موجود خامیوں کو ظاہر کرتی ہے۔

ماہرین کی وارننگ اور احتیاطی پیغام

پروفیسر ڈاکٹر فیصل محمود، ماہر وبائی امراض، آغا خان یونیورسٹی ہسپتال نے کہا کہ ’’ہم ایک ایسے مرحلے پر ہیں جہاں آگاہی پھیلاؤ کو روکنے اور اس کے بڑھنے کے درمیان فرق پیدا کر سکتی ہے۔ لہٰذا لوگوں اور معالجین دونوں کو علامات سے آگاہ ہونا چاہیے اور بروقت اقدام کرنا چاہیے‘‘۔

انہوں نے بتایا کہ ایم پاکس متاثرہ بستر، کپڑوں اور قریبی جسمانی رابطے سے پھیلتا ہے ۔ مزید یہ کہ طویل قریبی رابطے کے دوران سانس کی بوندوں کے ذریعے بھی منتقلی ممکن ہے ۔ اسی طرح بعض صورتوں میں یہ وائرس ماں سے بچے میں حمل یا پیدائش کے دوران منتقل ہو سکتا ہے ۔

علامات اور خطرے سے دوچار افراد

ایم پاکس کی عام علامات میں بخار، سوجے ہوئے لمف نوڈز اور جسم پر نمایاں دانے یا زخم شامل ہیں ۔ یہ علامات چہرے، ہتھیلیوں، تلوؤں اور جنسی اعضاء پر ظاہر ہو سکتی ہیں ۔

زیادہ تر افراد دو سے چار ہفتوں میں صحت یاب ہو جاتے ہیں، تاہم نوزائیدہ بچوں، حاملہ خواتین اور کمزور مدافعتی نظام رکھنے والے افراد میں بیماری شدید ہو سکتی ہے ۔

انفیکشن کنٹرول میں خامیوں پر تشویش

ڈاکٹر فاطمہ میر، ایسوسی ایٹ پروفیسر وبائی امراض نے کہا ’’ایم پاکس جلد سے جلد کے رابطے اور متاثرہ مریض سے سانس کے ذریعے پھیل سکتا ہے ۔ تاہم اگر علامات کو نظر انداز کیا جائے اور تنہائی میں تاخیر کی جائے تو کراس انفیکشن بڑھ سکتا ہے‘‘۔

یہ بھی پڑھیں

سندھ سالڈ ویسٹ مینجمنٹ کا جدید منصوبہ: ری سائیکلنگ اور توانائی پیداوار پر زور

خیرپور ایم پاکس کیسز: تحقیقاتی رپورٹ جاری، سات نوزائیدہ اموات کی وجوہات واضح

کی علامات والے مسافر کراچی پہنچ گئے MPox

پاکستان کو منکی پاکس کی ادویات کی فراہمی کی یقین دہانی

انہوں نے مزید کہا کہ صحت کی سہولیات میں انفیکشن کنٹرول کے ناقص اقدامات صورتحال کو مزید خراب کر سکتے ہیں، جبکہ یہ سب قابلِ روک تھام ہے ۔

ماہرین کی ہدایات اور عوام کیلئے مشورہ

ماہرین نے زور دیا کہ علامات ظاہر ہونے پر فوری خود کو الگ کریں، فوری طور پر طبی ماہرین سے رابطہ کریں اوراگر کسی تصدیق شدہ یا مشتبہ کیس سے رابطہ ہوا ہو تو 21 دن تک علامات کی نگرانی کریں ۔

اس کے ساتھ ساتھ صحت کے اداروں کو ہدایت دی گئی ہے کہ وہ فوری طور پر انفیکشن کنٹرول پروٹوکول کو مضبوط بنائیں، خاص طور پر نوزائیدہ بچوں اور زچگی کے شعبوں میں ۔