کمیونسٹ پارٹی آف چائنہ کو عوام پر اعتماد، نظریاتی اصولوں پر استقامت اور نظم و ضبط مضبوط بنانے کی ضرورت، شی جن پھنگ کا خطاب
ویب نیوز ڈیسک رپورٹ
بیجنگ: چینی صدر شی جن پھنگ نے کہا ہے کہ کمیونسٹ پارٹی آف چائنہ کے تمام اراکین کو اپنے نظریات پر ثابت قدم رہتے ہوئے نئے دور اور نئے سفر میں پارٹی کے مشن کی تکمیل کے لیے مسلسل جدوجہد جاری رکھنی چاہیے۔
انہوں نے یہ بات بیجنگ میں کمیونسٹ پارٹی آف چائنہ کے قیام کی 105ویں سالگرہ کے موقع پر منعقدہ تقریب سے خطاب کرتے ہوئے کہی۔ شی جن پھنگ کمیونسٹ پارٹی آف چائنہ کی مرکزی کمیٹی کے جنرل سیکرٹری، چین کے صدر اور مرکزی فوجی کمیشن کے چیئرمین بھی ہیں۔
نظریاتی اصولوں پر عمل کی ہدایت
چینی صدر نے کہا کہ پوری جماعت کو اپنی بنیادی نظریاتی اساس، بنیادی لائحہ عمل اور بنیادی پالیسیوں پر ثابت قدم رہنا چاہیے۔ ان کا کہنا تھا کہ پارٹی کی کامیابی کا انحصار اپنے بنیادی اصولوں پر عمل درآمد میں ہے۔
عوام پر اعتماد کی ضرورت
شی جن پھنگ نے زور دیا کہ عظیم تاریخی کامیابیاں حاصل کرنے کے لیے پارٹی کو ہمیشہ عوام پر اعتماد اور انحصار کرنا ہوگا۔ انہوں نے کہا کہ عوام کی حمایت ہی پارٹی کی اصل طاقت ہے۔
خطرات سے نمٹنے پر زور
انہوں نے کہا کہ مستقبل میں درپیش خطرات اور چیلنجز کا فعال انداز میں مقابلہ کرنا پوری پارٹی کی مشترکہ ذمہ داری ہے۔ ان کے مطابق تمام اراکین کو نئے حالات کے مطابق اپنی ذمہ داریاں مؤثر انداز میں نبھانی چاہئیں۔
یہ بھی پڑھیں
ایران کا امریکا پر فیفا ورلڈ کپ میں میزبانی کے اصولوں کی خلاف ورزی کا الزام
کرپٹو نے ٹرمپ کو کتنا مالا مال کیا؟
مشترکہ مستقبل اور نظم و ضبط
چینی صدر نے اس بات پر بھی زور دیا کہ پوری پارٹی کو انسانیت کے مشترکہ مستقبل کے تصور کو مسلسل فروغ دینا چاہیے۔ شی جن پھنگ نے مزید کہا کہ پارٹی کے اندر مکمل اور سخت نظم و ضبط، خود احتسابی اور داخلی نگرانی کے نظام کو مزید مضبوط بنانے کے لیے مستقل اقدامات کیے جانے چاہئیں۔