کراچی میں مٹی کے طوفان کا الرٹ جاری

آندھی اور مٹی کے طوفان کے خدشے پر بالائی سندھ میں الرٹ جاری، ضلعی انتظامیہ اور امدادی اداروں کو ہائی الرٹ رہنے کی ہدایت

ویب نیوز ڈیسک رپورٹ

کراچی: بالائی سندھ میں آندھی اور مٹی کے طوفان کا الرٹ جاری کردیا گیا ہے۔ شہریوں کو احتیاطی تدابیر اختیار کرنے کی ہدایت بھی کی گئی ہے۔

تفصیلات کے مطابق محکمہ موسمیات پاکستان اور صوبائی ڈیزاسٹر مینجمنٹ اتھارٹی نے بالائی سندھ میں گرد آلود آندھی اور مٹی کے طوفان کا الرٹ جاری کیا ہے۔

صوبائی ڈیزاسٹر مینجمنٹ اتھارٹی کے ڈائریکٹر جنرل سلمان شاہ کے مطابق مغربی ہواؤں کا نیا سلسلہ آج 2 مئی کی شام سے ملک کے شمال مغربی علاقوں میں داخل ہوگا۔

انہوں نے بتایا کہ اس موسمی سسٹم کے اثرات 2 اور 3 مئی کے دوران بالائی سندھ میں محسوس کیے جائیں گے۔ اس دوران گرد آلود ہوائیں اور مٹی کے طوفان کا امکان ہے۔

مزید برآں، تیز ہواؤں سے کمزور انفراسٹرکچر متاثر ہوسکتا ہے۔ بجلی کے کھمبے، بڑے اشتہاری بورڈز اور سولر پینلز کو نقصان پہنچنے کا خدشہ ظاہر کیا گیا ہے۔ اسی لیے شہریوں کو غیر ضروری طور پر باہر نکلنے سے گریز کی ہدایت دی گئی ہے۔

گرمی کی شدت میں کمی کا امکان

محکمہ موسمیات کے مطابق اس سسٹم کے باعث میدانی علاقوں میں گرمی کی شدت میں کمی آسکتی ہے۔ اس سے عوام کو بڑھتے درجہ حرارت سے کچھ ریلیف ملنے کی توقع ہے۔

یہ بھی پڑھیں

سیلاب الرٹ: گلگت بلتستان، پختونخوا میں گلیشیئر پھٹنے اور سیلاب کا خطرہ

پاکستانی طالب علم کی تحقیق اور چین پاکستان تعاون میں پیش رفت

کسانوں اور ضلعی انتظامیہ کو ہدایات

ڈائریکٹر جنرل صوبائی ڈیزاسٹر مینجمنٹ اتھارٹی سلمان شاہ نے کسانوں کو احتیاط برتنے کی ہدایت کی ہے۔ انہوں نے فصلوں اور کٹائی کی خصوصی دیکھ بھال پر زور دیا۔

دوسری جانب متعلقہ ضلعی انتظامیہ اور ڈپٹی کمشنرز کو ہائی الرٹ رہنے کا حکم دیا گیا ہے۔ حکام کو ہنگامی صورتحال سے نمٹنے کے لیے پیشگی اقدامات مکمل کرنے کی ہدایت بھی دی گئی ہے۔

مشیر برائے بحالی گیان چند ایسرانی کی خصوصی ہدایات پر صوبائی ڈیزاسٹر مینجمنٹ اتھارٹی کا عملہ مکمل الرٹ ہے۔ حکام کے مطابق عوام کے جان و مال کے تحفظ کے لیے تمام وسائل بروئے کار لائے جائیں گے۔