کراچی موسم میں نمی کا تناسب بڑھنے سے گرمی زیادہ محسوس ہوگی، محکمہ موسمیات نے سندھ کے کئی اضلاع میں شدید ہیٹ ویو سے خبردار کردیا

ویب نیوز ڈیسک رپورٹ

کراچی: بالائی فضاؤں میں موجود ہائی پریشر ایریا آج سے مزید طاقتور ہونے کا امکان ہے۔ اس کے باعث شہر قائد میں نمی کا تناسب بڑھ سکتا ہے، جس سے گرمی کی شدت زیادہ محسوس ہوگی۔

محکمہ موسمیات کے مطابق عید الاضحیٰ کے تینوں روز کراچی میں موسم گرم اور مرطوب رہنے کا امکان ہے۔ اس دوران سمندری ہوائیں وقفے وقفے سے بحال رہ سکتی ہیں۔

نمی میں اضافہ، گرمی کی شدت زیادہ محسوس ہوگی

محکمہ موسمیات کا کہنا ہے کہ شہر میں درجہ حرارت نسبتاً معتدل رہے گا، تاہم ہوا میں نمی بڑھنے سے اصل درجہ حرارت کے مقابلے میں زیادہ گرمی محسوس کی جاسکتی ہے۔

صبح کے اوقات میں نمی کا تناسب 80 فیصد جبکہ شام کے وقت 70 فیصد تک ریکارڈ ہونے کی توقع ہے۔

سندھ کے مختلف اضلاع میں ہیٹ ویو کا خدشہ

محکمہ موسمیات کے مطابق بالائی فضا میں بننے والے سسٹم کے زیر اثر 31 مئی تک سندھ کے بیشتر اضلاع میں درمیانی سے شدید ہیٹ ویو کی صورتحال پیدا ہوسکتی ہے۔

اس دوران سکھر، شکارپور، قمبر شہدادکوٹ، جیکب آباد، لاڑکانہ، موہن جو دڑو، دادو، شہید بینظیر آباد، گھوٹکی، خیرپور اور نوشہرو فیروز میں درجہ حرارت معمول سے 4 سے 6 ڈگری سینٹی گریڈ زیادہ رہنے کا امکان ہے۔ ان شہروں میں پارہ 47 سے 50 ڈگری سینٹی گریڈ تک جاسکتا ہے۔

اسی طرح تھرپارکر، بدین، حیدرآباد، ٹنڈو محمد خان، عمرکوٹ، میرپورخاص، جامشورو اور سانگھڑ میں بھی شدید گرمی پڑنے کا امکان ظاہر کیا گیا ہے، جہاں زیادہ سے زیادہ درجہ حرارت 44 سے 47 ڈگری سینٹی گریڈ تک پہنچ سکتا ہے۔

یہ بھی پڑھیں

اے سی درجہ حرارت: 25.5 ڈگری کیوں ہے بہترین سیٹنگ؟ ماہرین کا انکشاف

آبنائے ہرمز مذاکرات کا حصہ نہیں بنے گا: ایران

شہریوں اور کاشتکاروں کو احتیاط کی ہدایت

ہیٹ ویو کے پیش نظر محکمہ موسمیات نے خصوصاً بچوں، خواتین اور بزرگ شہریوں کو احتیاطی تدابیر اختیار کرنے کا مشورہ دیا ہے۔

کاشتکاروں کو بھی ہدایت کی گئی ہے کہ وہ موسمی صورتحال کے مطابق فصلوں کی دیکھ بھال کریں اور مویشیوں کا خاص خیال رکھیں۔ شہریوں کو صبح 10 بجے سے شام 4 بجے تک غیر ضروری طور پر دھوپ میں نکلنے سے گریز کرنے کی ہدایت کی گئی ہے۔ ساتھ ہی جسم میں پانی کی کمی سے بچنے کے لیے زیادہ پانی پینے کا مشورہ بھی دیا گیا ہے۔