فٹبال ورلڈکپ: ایرلنگ ہالینڈ کے دو گول، ناروے نے برازیل کو شکست دے کر پہلی بار کوارٹر فائنل میں جگہ بنا لی، نیمار آبدیدہ ہوگئے۔
ویب نیوز ڈیسک رپورٹ
نیویارک: فیفا فٹبال ورلڈکپ 2026 کے پری کوارٹر فائنل میں ناروے نے پانچ بار کی عالمی چیمپئن برازیل کو 1-2 سے شکست دے کر ایونٹ سے باہر کر دیا اور پہلی بار کوارٹر فائنل میں جگہ بنا لی۔
نیو جرسی میں کھیلے گئے میچ میں ناروے نے شاندار کھیل کا مظاہرہ کرتے ہوئے برازیل کو ایک کے مقابلے میں دو گول سے شکست دی۔
ایرلنگ ہالینڈ کے دو فیصلہ کن گول
ناروے کی جانب سے دونوں گول ایرلنگ ہالینڈ نے اسکور کیے۔ انہوں نے پہلا گول 79ویں منٹ میں کیا، جبکہ دوسرا گول مقررہ وقت کے 90ویں منٹ میں اسکور کیا۔
برازیل کی جانب سے واحد گول میچ کے اختتامی لمحات میں نیمار جونیئر نے پنالٹی کک پر کیا، تاہم یہ گول ٹیم کو شکست سے نہ بچا سکا۔
ناروے پہلی بار کوارٹر فائنل میں
اس کامیابی کے ساتھ ناروے نے میگا ایونٹ کی تاریخ میں پہلی مرتبہ کوارٹر فائنل میں جگہ بنا لی، جبکہ پانچ بار کی عالمی چیمپئن برازیل کا سفر اختتام پذیر ہو گیا۔
جیت کا منفرد جشن
برازیل کے خلاف تاریخی فتح کے بعد ناروے کی ٹیم نے اسٹیڈیم میں موجود ہزاروں شائقین کے ساتھ منفرد انداز میں جشن منایا۔
پہلے فاتح ٹیم کے کوچ اسٹیل سولباکن نے شائقین کا جوش بڑھایا، پھر ناروے کے کھلاڑیوں نے روایتی انداز میں ڈرم کی تھاپ پر جشن منایا۔
ڈرم بجانے کی ذمہ داری میچ کے ہیرو ایرلنگ ہالینڈ کو دی گئی، جس پر پورا اسٹیڈیم جشن کے نعروں سے گونج اٹھا۔
یہ بھی پڑھیں
فٹبال ورلڈکپ: انگلینڈ نے میکسیکو کا سفر تمام کر دیا
دنیا کا سب سے پست قامت جوڑا
نیمار آبدیدہ
دوسری جانب، فیفا فٹبال ورلڈکپ میں ناروے سے شکست کے بعد ورلڈکپ جیتنے کا خواب ٹوٹنے پر برازیل کے اسٹار کھلاڑی نیمار جونیئر آبدیدہ ہو گئے۔
واضح رہے کہ کوارٹر فائنل میں ناروے کا مقابلہ انگلینڈ سے ہوگا، جس نے اپنے پری کوارٹر فائنل میں میزبان میکسیکو کو شکست دے کر آخری آٹھ ٹیموں میں جگہ بنائی۔