کراچی میں 300 پولیس افسران کے انٹرویوزمکمل،بڑی تعداد میں ایس
ایچ اوز کی تقرریاں اور تبادلےمتوقع، بیشتر ایس ایچ اوز کو عہدوں سے بر خاست کئے جانے کا امکان
کراچی (رپورٹ روبینہ یاسمین ) شہر کے تمام تھانے داروں سمیت تقریباََ 300 سے زائد افسران کے ایڈیشنل آئی جی کراچی کی سربراہی میں کمیٹی نے انٹرویوز مکمل کر لئے ۔
ایڈیشنل آئی جی کراچی خادم حسین رند، تینوں زون کے ڈی آئی جیز عاصم خان قائم خانی، غلام اظفر مہیسر، اسد رضا اور تمام ایس ایس پیز نے کراچی پولیس آفس (کے پی او) میں انسپیکٹر اور سب انسپیکٹر کے عہدے کے پولیس افسران کے انٹرویوز کیے۔
پولیس ذرائع کے مطابق انٹرویوز میں تمام تھانوں کے ایس ایچ اوز کوبھی بلایا گیا تھا تا کہ ان کے تھانے میں تعیناتی کے دورانیے اور کارکردگی کی جانچ پڑتال کی جائے۔
ذرائع نے بتایا کہ گزشتہ سالوں کے سیاسی دورانیے میں تعینات رہنے والے بیشتر ایس ایچ اوز کو عہدوں سے بر خاست کیا جا رہا ہے
ذرائع کے مطابق سابقہ دور میں اب تک ایس ایچ او کے عہدے پر تعیناتی سے محروم پولیس افسران کو بھی آئندہ کام کرنے کا موقع دیا جائے گا جبکہ کرپشن اور دیگر الزامات کا سامنا کرنے والے کئی ایس ایچ اوز کے خلاف تحقیقات بھی کی جائیں گی۔
ذرائع کا کہنا ہے کہ اندازے کے مطابق تقرہباََ 80 ایس ایچ اوز کی فہرستیں تیار کرلی گئی ہیں اور تلخ فیصلے بھی لیے جا رہے ہیں۔
